(ភ្នំពេញ)៖ ចម្រៀងល្បីៗជាច្រើន រួមទាំងបទ «ស្នេហ៍ក្នុងសុបិន» ផងនោះ ត្រូវបានទស្សនិកជនខ្មែរនិយមស្តាប់គ្រប់ទិសទី រហូតមកទល់នឹងបច្ចុប្បន្ននេះ ក៏នៅតែល្បីល្បាញ និងពេញនិយមស្តាប់រហូតមក ដែលជាស្នាដៃចម្រៀង របស់អ្នកចម្រៀងជើងចាស់ខ្មែរមួយរូបគឺ លោក នី សាលឿន។ យ៉ាងណាមិញនៅរសៀល ថ្ងៃទី០៩ ខែវិច្ឆិកា នេះមានដំណឹងសោកស្តាយមួយ ដោយលោក នី សាលឿន បានទទួលមរណភាពហើយ ក្នុងជន្មាយុ ៥៤ឆ្នាំ ដោយសាររោគាពាធ នៅសហរដ្ឋអាមេរិក។
ជាមួយគ្នានេះផងដែរ លោក ដួង វីរៈសិទ្ធក៏បានម្ដែងការសោកស្ដាយចំពោះការបាត់បង់របស់អ្នកចម្រៀងជើងចាស់ លោកក៏បានសរសេរនៅលើផេកផ្លូវការបស់លោកថា « ថ្ងៃនេះខ្ញុំបាទបានទទួលដំណឹងដ៏សែនក្រៀមក្រំ ថាលោក ពូ នី សាលឿន ម្ចាស់បទស្នេហ៍ក្នុងសុបិន ដែលខ្ញុំបាទបានយកមកច្រៀងឡេីងវិញបានទទួលលាចាកលោកទៅហេីយក្មួយពិតជារន្ធត់ចិត្ត និង សោកស្ដាយក្រៃលែងជាការបាត់បង់រៀមច្បងសិល្បករដែលពោរពេញដោយទេពកោសល្យសិល្បៈ របស់ ប្រទេសជាតិយេីង ..ខ្ញុំបាទសូមចូលរួមរំលែកទុក្ខដល់ក្រុមគ្រួសារ លោក ពូ នី សាលឿន ផង និងសូមអោយវិញ្ញាណក្ខន្ធលោកពូ បានទៅកាន់សុគតិភពកុំបីឃ្លៀងឃ្លាតឡេីយ ...សំឡេងដ៏ក្រអួនក្រអៅរបស់លោកពូនៅតែស្ថិតក្នុងបេះដូងកូនខ្មែរគ្រប់ជំនាន់ ជារៀងរហូត ។ ខ្ញុំបាទសូមឱនកាយគោរពវិញ្ញាណក្ខន្ធលោក ពូ នី សាលឿន ពីចម្ងាយសូមក្រុមគ្រួសារ លោកពូ នី សាលឿន ទទួលការគោរពដ៏ខ្ពង់ខ្ពស់ពី ខ្ញុំបាទ ដួង វីរ:សិទ្ធ ដោយ អនុគ្រោះ ផង ..»
តារាចម្រៀង លោក នី សាលឿន បានបន្សល់ទុកនូវចម្រៀងពីរោះៗជាច្រើនបទ មហាជននៅតែស្តាប់រហូតដល់សព្វថ្ងៃ រួមមាន បទ ចំប៉ីកំពង់ចាម , វាសនាអ្នកនេសាទ, ដងស្ទឹងឡូវ៉ែល , ស្នេហ៍ក្នុងសុបិន និង បទបងស្រឡាញ់តែអូន ជាដើម។ ការទទួលមរណភាពរបស់តារាចម្រៀងជើងចាស់ខ្មែរ នី សាលឿន បានធ្វើឲ្យប្រិយមិត្តអ្នកនិយមស្តាប់ចម្រៀងរបស់លោក សម្តែងក្តីសោកស្តាយយ៉ាងខ្លាំង ត្បិតលោកបានបន្សល់ស្នាដៃចម្រៀងជាច្រើន សុទ្ធសឹងតែពីរោះ និងមានការគាំទ្រច្រើន។
ដំណឹងកម្ពុជា សូមចូលរួមរំលែកទុក្ខដ៏ក្រៀមក្រំ ចំពោះក្រុមគ្រួសារនៃសពរបស់លោក នី សាលឿន ពីចំងាយ និងសូមបួងសួងដល់វិញ្ញាណក្ខន្ធរបស់លោក បានទៅកាន់សុគតិភពកុំបីឃ្លៀងឃ្លាតឡើយ៕
Comments
Post a Comment